'Pathian hnaih' Crusade tan

Aizawl | July 25, 2025: TKP Republic Vengthlang Unit Evangelical Cell buatsaih 'Pathian hnaih Crusade' chu zanin atang khan tan a ni a, speaker Aizawl area Executive secretary Rev Dr C Lalhungliana hnen atangin thuchah ngaihthlak a ni.

Crusade thupui hi 'Pathian hnaih' a ni a. Zanin inkhawm hi TKP Republic Vengthlang Unit Treasurer, Evangelical Cell Chairman ni bawk R Lalthlanawmi'n a kaihruai.

Crusade

Speaker: Rev Dr C. Lalhungliana

Thupui  : Pathian hnaih

Zan 1 - na

Bible chhiar : Isaia 1:2&3, Amosa 4:4, Matthaia 15:8&9

* Rawngbawltu nung, rawngbawltu chak ṭha leh thlarau lama hrisel ni tur chuan Pathian hnaih a pawimawh

* Pathian hnaih tih awmzia ber chu Pathian pawl tura ama hnen a kal/amaha intulut/Pathian nena nun inzawm neih tih te pawhin a sawi theih ang. 

* Pathian hlat tute chu mahni duh dan a kal ngat ngat an ni ṭhin. 

* Tisa/lang thei lamah rawngbawlna leh Pathian chibai buk fo mah ila thinlung taka Pathian biak si loh hi a hlauhawm. 

* Prog hlimawm leh nuam ringawt a hun hman fo hi Pathian hnaih tute awm dan tur a ni lo. 

* Kan vei em em Biak In thleng phalo te aiin keimahni hi kan ral hmasak kan ngai. 

* Nun beidawng, mangang, rethei leh tlu chhia ten an pan ngam loh khawpin kan Biak bûk te hi a chhunga cheng ṭhin te hian hmuh theih lamah hian kan lo dah ropuiin kan lo ti thianghlim lutuk ange? 

* Pathian malsawmna dawng thei tur chuan Pathian kan hnaih angai. 

* Rawngbâwl inti a phe phe si hian amah hnaihna tak tak nun kan hlauh thung. 

* Pathian hnaihna tak tak tello chuan rawngbawlna a hlu theilo. 

* Pathian hnaihna tak tak nun neitu chuan rawngbawlna hi peih avanga tih tur leh peih loh avanga tih loh tur ah a dah lo, a tirtu Pathianin ti tura a tih ang in a ti mai ṭhin. 

* Pathian hnaih na tâk tâk nun kan neih leh neih loh mahni in enfiah ila, amah hnaih a rawngbawlna chuan rah ṭha leh duhawm a chhuah ṭhin. 

Zanin Sermon tlangpui ka hriat theih chin chin kan han thailang ve a ni e, kimlo tâk chungin.

- Albert VL Rohlua

Vice President, TKP Republic Vengthlang Unit